பேரம் படிந்தது,வேலை முடிந்தது‍‍ -C.I.D சிங்காரம்

பாட்டாளி மக்கள் கட்சி நிறுவனர் மருத்துவர் அய்யா அவர்கள் இன்று கலைஞரைத்தாக்கி கடுமையான அறிக்கையொன்றை வெளியிட்டுள்ளார். உலக நாடுகளெல்லாம் இலங்கையினவாதப் போரை எதிர்த்துக்குரல் கொடுத்துக் கொண்டிருக்கும் வேளையில், “நாங்கள் செய்ததெல்லாம் செய்துவிட்டோம் இனி இதற்கு மேல் எதுவும் செய்வதற்கில்லை” என்று இலங்கை தமிழர்களையும், அவர்களது நலன்களையும் தமிழக அரசும், அதன் முதல்வர் தலைவர் கலைஞரும் கைகழுவி விட்டனர் என்று தெரிவித்திருக்கிறார். அது மட்டுமின்றி இறையாண்மை மிக்க அண்டை நாட்டில் நடைபெறும் பயங்கர நிகழ்வுகளில், இந்தியா ஓரளவுக்கு மேல் தலையிட முடியாது என்ற தவறான கருத்து இதுவரை டெல்லியில்தான் இருந்தது. இப்போது, சென்னைக்கும் அது பரவிவிட்டது என்றும் அந்த அறிக்கையில் தொடர்ந்திருக்கிறார்.

சாதரண நாட்களில் பார்க்கும் அரசியல்வாதிகளுக்கும் தேர்தல் நேர அரசியல் வியாதிகளுக்கும் நிறைய வேறுபாடு இருக்கிறது. ஒருவன் தேர்தல் நேரத்தில் தும்மினாலே அது அவனின் ஓட்டு நாடகம் என்று மக்கள் உணர்ந்துவிட்டார்கள்.  நம்முடைய கேள்வி பாம்பும் சாகக்கூடாது,கொம்பும் ஒடியக்கூடாது என்ற பாணியில் ஈழத்தமிழர்களின் வேதனையை சாதனையாக மாற்றிக்கொண்டு இலாபம் சம்பாதிக்கும் தமிழினத் தலைவர்களை,தமிழினக் காவலர்களை தமிழகம் தவிர வேறு எங்குமே நாம் காணமுடியாது.

அய்யா தமிழ்குடிதாங்கி அவர்களே,அது இலாபமோ, நஷ்ட‌மோ கலைஞராவது இந்தா அந்தா என கடிதம் எழுதி,அறிக்கை விட்டு,பந்த் நடத்தி (கலைஞருக்கு பந்த் என்றாலே திருநெல்வேலி அல்வாவ திகட்டாம‌ சாப்பிடுவது மாதிரி) ஏதேதோ செய்துபார்த்தார். இப்போது எலக்சன் வந்து வந்துவிட்டதால் ஒக்கணேக்கல் கூட்டுக்குடிநீர்த்திட்டம்,சேது ச‌முத்திர திட்டம் ஆகிய வெயிட்டிங் லிஸ்டில் ஈழத்தமிழர்களையும் சேர்த்துவிட்டார். ஆனால் நீங்கள் என்ன செய்தீர்கள்? ஏதுமில்லை. இத்தனை நாள் காங்கிரஸுடன் அதாவது திமுகவுடம் கூட்டனி சேரலாம் என்ற ஐடியா உங்களுக்கு இருந்தது.ஆனால் இப்போது அதிமுகவுடன் சேர்ந்துவிடுவதற்கான காலம் கணிந்துவிட்டதால், அல்லது  அங்கு உங்களின் பேரம் படிந்துவிட்டதால்  ஈழத்தமிழர்கள் உங்கள் கண்களுக்குள் மின்னலடிக்கிறார்கள்.. இதே நீங்கள் காங்கிரசுடன் கூட்டனி சேர்ந்திருக்கும் பட்சத்தில் உங்களிடமிருந்து இப்படி ஒரு அறிக்கை வந்திருக்காது. நீங்களெல்லாம் தமிழைக் காப்பாற்றுகிறேன் என்று விளம்பரப்படுத்திக் கொண்டு சம்பாதிக்கும் ஓர் தமிழ் வியாபாரி என்பது தான் அரசியல் ஆர்வலர்களின் கருத்து.

அய்யா!  எனக்கொரு சந்தேகம் மக்கள் தொலைக்காட்சியில் தொலைபேசியில் பேசுபவர்கள் “மக்கள் வணக்கம்” என கூறவேண்டும் என்பது சிறந்த திட்டம் தான். ஆனால்  உங்கள் மக்கள் தொலைக்காட்சி அலுவலகத்திற்கு தொடர்புகொண்டால் அவர்கள் “ஹலோ” என்கிறார்கள்,“கொஞ்சம் வெயிட் பண்ணுங்க” என்கிறார்கள்.

காரணம் என்ன‌ ? அது காட்சிஊடகம் வெளியே தெரியும், இது அலுவலகம் வெளியே தெரியாது என்பதாலா? தமிழக மக்கள் எப்போதும் ஒரேபோல இருக்கமாட்டார்கள் அய்யா கவணம்.

-C.I.D சிங்காரம்